Teri meri Rahen

Sneak

"پہلے یہ بتائیں، مجھ سے شادی کا فیصلہ آپ نے دل سے کیا ہے یا دماغ سے؟"

اس سے ہر قسم کی بے باکی اور بدتمیزی کی توقع کی جا سکتی تھی، پھر بھی لمحہ بھر کو غزنوی چکرا گئے، گویا امید نہیں تھی کہ سب کی موجودگی میں وہ براہ راست ایسا کوئی سوال کرے گی۔ بہرحال فورا سنبھل بیٹھے اور اسے کلائی سے تھام کر تقریبا گھسیٹتے ہوئے اپنے کمرے میں لے آئے۔ اس دوران اپنی کلائی چھڑانے کی کوشش میں اس نے ان کے بازو اور ہاتھ کو بری طرح اپنے ناخنوں سے نوچ ڈالا، اس کے باوجود ان کی گرفت ڈھیلی نہیں ہوئی اور کمرے میں آتے ہی انہوں نے ایک جھٹکے سے اس کا بازو مروڑ کر کمر کے پیچھے کر لیا، جس سے وہ چیخ پڑی۔

"یہ کیا بدتمیزی ہے؟ چھوڑیں میرا ہاتھ۔" انہوں نے دھکا دے کر اسے صوفے پر گرا دیا، پھر چبا چبا کر بولے

" تم میں شرم، حیا، لحاظ، مروت کی اگر کمی ہے، تو اس کا یہ مطلب نہیں ہے کہ تم علی الاعلان اس کا اظہار بھی کر دو۔ تم اپنے آپ کو بہت اسمارٹ سمجھتی ہو؟"

"میں خود کو کچھ بھی سمجھوں یا کچھ بھی کروں، آپ کون ہوتے ہیں مجھے ٹوکنے والے؟" وہ تنک کر بولی۔

"میں بھی تو تمہیں صرف تمہارا عم زاد ہوں اور اس ناتے بھی میں تمہیں ٹوکنے کا حق رکھتا ہوں۔"

"جی نہیں، ایسا کوئی حق نہیں ہے آپ کو۔ اگر رعب جمانے کا اتنا ہی شوق ہے تو سیما، حرا وغیرہ موجود ہیں، ان پر اپنا شوق پورا کر لیں، میں کسی کے رعب میں نہیں آنے والی!"

وہ برابر سے جواب دے کر انہیں طیش دلا رہی تھی، لیکن وہ بڑے ضبط سے بولے:

"جانتا ہوں۔"

"جانتے ہیں تو مجھے یہاں لے کر کیوں آئے ہیں؟"

"تمہاری بات کا جواب دینے کہ تم سے شادی کا فیصلہ میرے دل اور دماغ کا مشترکہ فیصلہ ہے، تمہیں کوئی اعتراض ہے؟"

اس نے یقیناً "ہاں" کہنے کے لیے منہ کھولا تھا کہ وہ فورا روک کر کہنے لگے:

"ایک منٹ، ابھی نہیں۔ اچھی طرح سوچ کر جواب دینا۔ ناؤ گیٹ لاسٹ!"

ان کے آخری الفاظ پر وہ بری طرح سلگ گئی۔

"میں خود نہیں آئی، آپ لے کر آئے ہیں مجھے۔ بڑے آئے گیٹ لاسٹ کہنے والے! اور اچھی طرح سن لیں، میں ہرگز ہرگز آپ سے بلکہ کسی سے بھی شادی نہیں کروں گی، یہ میرا فیصلہ ہے۔" بہرحال اب وہ پہلے والی نومیہ نہیں رہی تھی۔ مامتا کی آغوش سے نکل کر وہ صرف دو سال حالات کی بھٹی میں جھلسی تھی اور ان دو سالوں نے اسے بہت کچھ سکھا دیا تھا۔ اپنے ساتھ ہونے والے سانحے کا اسے دکھ تو تھا، لیکن زیادہ دکھ اس بات کا تھا کہ سب کچھ بہت جلدی اس پر بیت گیا تھا۔

جس روز غزنوی ایم بی اے کر کے لوٹے، تو سب کے درمیان اس نے انہیں بھی نہیں بخشا تھا۔

"ارے! آپ تو چھڑے چھانٹ واپس آ گئے، لگتا ہے کسی میم نے لفٹ ہی نہیں کرائی۔" اور غزنوی کے بری طرح گھورنے پر بولی تھی: "دلبرداشتہ ہونے کی ضرورت نہیں ہے، یہاں بہت لفٹ ملے گی۔"

اور غزنوی کو خطوط کے ذریعے اس کے حالات سے آگاہی تو تھی، لیکن یہ نہیں جانتے تھے کہ حالات اس پر کس طرح اثر انداز ہوئے ہیں، بلکہ ان کا خیال تھا کہ وہ جو پہلے ہی کمزور اور بزدل قسم کی لڑکی تھی، اب تو ایک دم ہی ٹوٹ پھوٹ کر رہ گئی ہوگی۔ حقیقتاً دیارِ غیر میں جب کبھی انہیں اس کا خیال آتا تو پھر وہ کتنی دیر تک اس کے لیے کڑھتے رہتے کہ اس کے ساتھ اچھا نہیں ہوا۔ ابھی اس کی عمر ہی کیا ہے، یہ اس کی بے فکری کے دن تھے اور وہ اتنی فکروں میں گھر گئی ہوگی! انہیں اس سے ہمدردی محسوس ہوتی، اور یہاں اگر ساری ہمدردی غصے میں بدل گئی تھی، خصوصاً جب وہ انہیں نام لے کر پکارتی تو ان کا دماغ گھوم جاتا، کیونکہ گھر میں سب سے بڑے ہونے کے باعث انہیں شروع ہی سے ایک مقام حاصل تھا اور ترتیب کے حساب سے وہ سب سے آخری نمبر پر تھی، یعنی سب سے چھوٹی، اور جب انہوں نے عمروں کا فرق جتا کر ٹوکا تو وہ دھڑلے سے بولی تھی:

"عمروں کا فرق کوئی اہمیت نہیں رکھتا، میں بچی کی ماں ہوں اور آپ کی تو ابھی شادی بھی نہیں ہوئی۔"

"یہ گویا ماں ہونے کا زعم ہے۔" انہوں نے سرتاپا اسے دیکھا تھا، ویسی ہی دبلی پتلی، اسمارٹ۔

"کیوں نہ ہو، ہر ایک کے حصے میں تھوڑی آتا ہے یہ زعم!"

"وقت آنے پر سب کے حصے میں آتا ہے، لیکن تمہاری طرح کوئی آپے سے باہر نہیں ہو جاتا۔"

"وقت آنے پر ناں! اور مجھے؟ مجھے کیونکہ وقت سے پہلے حاصل ہو گیا ہے، اس لیے..."

"شٹ اپ!" وہ اس کے برابر سے جواب دینے پر سختی سے ٹوک کر بولے تھے: "میں تم سے بحث نہیں کرنا چاہتا، بس اتنا سن لو کہ آئندہ مجھ سے بات کرتے وقت کسی زعم کے بجائے میری اور اپنی عمر کے فرق کو ذہن میں رکھنا۔"

"مشکل ہے۔" وہ کہہ کر فورا ان کے سامنے سے ہٹ گئی تھی، پھر غزنوی نے خود ہی اس سے بات کرنی چھوڑ دی تھی۔ شاید اپنی بڑائی اور عزت قائم رکھنے کا یہی طریقہ ان کی سمجھ میں آیا تھا۔ اسے دیکھ کر یوں گزر جاتے جیسے اس کا وجود ہی نہ ہو، اور اسے ہرگز پروا نہیں تھی، لیکن کسی کسی وقت محض انہیں چھیڑنے کی خاطر کوئی ایسی بات کہہ جاتی جس سے وہ تلملا جاتے۔ غصہ ان کی آنکھوں سے چھلکنے لگتا اور جیسے بس نہیں چلتا تھا کہ اس کی گردن دبا دیں۔ گھر میں سب ہی جانتے تھے کہ وہ اس سے کتنا خار کھاتے ہیں، جبھی تو ان کے شادی کے فیصلے نے سب کو حیران کر دیا تھا۔

البتہ سمیرا کی بات طے ہو جانے کے بعد جب اس نے سنا کہ بڑے ابا کا ارادہ دونوں شادیاں ایک ساتھ کرنے کا ہے، تب پہلے اس نے امی کے سامنے زبان کھولی کہ وہ بڑے ابا سے صاف انکار کر دیں، لیکن امی نے صاف اپنا دامن بچا لیا:

"میں کیسے انکار کر سکتی ہوں؟ اور وہ میری مانے گے کب؟ ان کے لیے جیسے سمیرا ہے، ویسے تم ہو، کبھی کوئی فرق رکھا انہوں نے؟ پھر میں کیسے تم پر صرف اپنا حق جتا سکتی ہوں؟"

وہ سمجھ گئی کہ امی سے مزید کچھ کہنا فضول ہے اور براہِ راست بڑے ابا سے کہنا بہت مشکل تھا۔ آتے جاتے وہ غزنوی کو سنا کر کہنے لگی:

"ضرور ان لوگوں میں کوئی خامی ہوتی ہے جو اچھی لڑکیوں کو چھوڑ کر طلاق یافتہ سے شادی کرتے ہیں۔"

دو دن غزنوی اس کی بکواس سن کر نظر انداز کرتے رہے اور جب ان کی برداشت کی حد ختم ہو گئی، تب پھر اسے گھسیٹتے ہوئے لے آئے۔

"آخر ان باتوں سے تمہارا مقصد کیا ہے؟" انہوں نے جتنے غصے سے پوچھا، وہ اتنے ہی آرام سے بولی:

"بہت واضح! کہ آپ مجھ سے شادی سے باز آ جائیں۔"

"یہ تو میں بھی سمجھتا ہوں، لیکن آخر کیوں؟ کیوں شادی نہیں کرنا چاہتیں تم؟ پہلی شادی کی ناکامی سے خوفزدہ ہو یا...؟"

"میں کسی بات سے خوفزدہ نہیں ہوں۔" وہ فورا بول پڑی۔

"پھر؟" وہ مجسم سوالیہ نشان بن گئے، جس سے وہ چڑھ کر بولی:

"پھر کیا؟ بس مجھے نہیں کرنی شادی۔"

"اسی لیے تو پوچھ رہا ہوں کیوں؟ دیکھو، جب تک تم ٹھوس وجہ نہیں بتاؤ گی، تمہاری کوئی بات نہیں سنی جائے گی۔"

آخر میں انہوں نے نرم لہجہ اختیار کر کے اسے اعتماد میں لینے کی کوشش کی:

"یہ کوئی زبردستی ہے کیا؟"

"زبردستی کی بات نہیں ہے نومیہ! تم سمجھنے کی کوشش کرو، چچی جان تمہاری ہی عمر میں بیوہ ہوئی تھیں۔ اس کے بعد ان کا دوسری شادی نہ کرنے کا فیصلہ صحیح تھا یا غلط، یہ میں نہیں جانتا، لیکن یہ یقین سے کہوں گا کہ تم ان کی طرح زندگی نہیں گزار سکتیں۔"

پیشانی پر بے شمار شکنیں ڈال کر وہ بولی: "کیوں؟"

"اس لیے کہ زمانہ بدل گیا ہے۔ محبتیں، رواداریاں، سب وقت اپنے ساتھ بہائے لیے جا رہا ہے۔ یہ برسوں پہلے کی بات ہے، جب چچی جان تمہاری انگلی تھام کر دوبارہ اس گھر میں داخل ہوئی تھیں، تو انہیں یقین تھا کہ یہاں تمہیں باپ نہیں تو باپ جیسی شفقتیں ضرور ملیں گی، اور یہ تم جانتی ہو کہ ان کے یقین کو ٹھیس نہیں پہنچی تھی۔ کیا تمہارے پاس ایسا کوئی یقین ہے؟"

انہوں نے اچانک اسے سامعہ کا احساس دلایا، اور ابھی وہ جواب نہیں دے پائی تھی کہ کہنے لگے:

"میں صرف سامعہ کے دورِ خیال کی نہیں، یہاں کی بات کر رہا ہوں۔ یہاں بھی کوئی نہیں ہے، سب اپنی اپنی زندگیوں میں مصروف ہو جائیں گے، پھر تم سامعہ کی زندگی کے اس خلا کو کیسے پر کرو گی؟"

"اس کا باپ زندہ ہے، غزنوی! اور جیتے جی باپ نے اسے جس شفقت سے محروم کر دیا، وہ کوئی دوسرا بھی اسے نہیں دے سکتا۔"

اس کے ناگوار اور سخت لہجے پر وہ رک کر بولے:

"میں جو دینا چاہتا ہوں!"

"کیوں؟"

"اس لیے کہ..." وہ کچھ کہتے کہتے ایکدم خاموش ہو کر اسے دیکھنے لگے۔ جس طرح وہ براہِ راست ان کی آنکھوں میں آنکھیں ڈالے کھڑی تھی، اس سے وہ سمجھ گئے کہ اس وقت اسے سمجھانے اور احساس دلانے کی ان کی کوئی بھی کوشش کامیاب نہیں ہوگی، جبھی بات ختم کرتے ہوئے بولا

"خیر، میں تم سے بحث نہیں کرنا چاہتا، بس اتنا کہوں گا کہ اپنا نہیں تو سامعہ کا خیال کرو۔"

"اور میں آپ سے یہ کہوں گی کہ آپ کو فکر کرنے کی ضرورت نہیں ہے۔"

Download Novel PDF

Read Novel Online

Description — Urdu

Summary — Urdu

Related Keywords